O legado dos ribeiraos

Embarcacións fluviais, da herdanza patrimonial a novos usos en activación. Barcas de paso. Naúfragos. Mitos dos ríos. Artes de pesca fluvial... Sabemos que a primeira navegación experimentada foi a fluvial. Todas as correntes de certa entidade contaron con embarcacións, estando documentadas en máis de trinta ríos galegos. As primeiras datadas no século II a. C., como son as canoas monóxilas do Limia, na tradición do actual barco de dornas. Con dez tipoloxías recuperadas que chegan a nós, desde o colectivo Barcas do Minho apostamos pola utilización social e o lecer. E recollemos as artes de pesca e a memoria dos veciños das ribeiras, mesmo a explicación mitolóxica, sen esquecer as desfeitas provocadas polos encoros.